Njëzet e nëntë vjet pas vdekjes së Princeshës Diana, rikthimi i Princit Harry dhe Meghan Markle në Mbretërinë e Bashkuar pritet të rikthejë tensionet brenda familjes mbretërore britanike.
Harry, i cili në moshën 12-vjeçare ecte pas arkivolit të nënës së tij gjatë ceremonisë mortore, gjashtë vite pas tërheqjes nga detyrat mbretërore dhe zhvendosjes në Kaliforni, po përgatitet të jetojë sërish në Britani. Sipas raportimeve, çifti ka gjetur një banesë jashtë Londrës, ndërsa dy fëmijët e tyre janë regjistruar në shkollë dhe pritet të nisin mësimet në shtator.
Lajmi ka shkaktuar reagime të ndryshme në opinionin britanik. Sipas një sondazhi të YouGov, 33% e britanikëve nuk e miratojnë kthimin e Sussex-ëve, 21% e mbështesin, ndërsa 45% janë shprehur se nuk e dinë nëse e miratojnë apo jo. Sondazhi u zhvillua më 20 gusht, me pjesëmarrjen e 5,810 të rriturve britanikë.
Meqë Duka dhe Dukesha e Sussex nuk janë më anëtarë aktivë të familjes mbretërore pas tërheqjes së tyre nga detyrat zyrtare në vitin 2020, nuk pritet që atyre t’u jepet një rezidencë mbretërore apo të kryejnë detyra publike.
Në korrik, Harry, Meghan dhe fëmijët e tyre vizituan Mbretin Charles në Highgrove House, në Gloucestershire. Në takim ishte e pranishme edhe Mbretëresha Camilla.
Pavarësisht takimit me të atin, Princi William nuk ka bërë asnjë deklaratë publike për rikthimin e vëllait të tij në Britani. Marrëdhëniet mes dy vëllezërve prej vitesh konsiderohen të tensionuara.
Peter Hunt, ish-korrespondent mbretëror i BBC-së, ka paralajmëruar se rikthimi i Harry-t dhe Meghan-it mund ta thellojë edhe më shumë përçarjen.
Sipas tij, në planin afatgjatë, prania e Sussex-ëve në Britani mund të krijojë dy qendra ndikimi brenda familjes mbretërore: njëra rreth William-it dhe tjetra rreth Harry-t.
Ndërkohë, kthimi në atdhe mund t’i japë Harry-t mundësinë të forcojë marrëdhënien me të atin, ndërsa prania e tij në Britani mund ta bëjë më të vështirë për William-in shmangien e një pajtimi me të vëllanë.
Vdekja e Princeshës Diana në gusht të vitit 1997, në moshën 36-vjeçare, pati një ndikim të thellë te Harry. Imazhi i princit 12-vjeçar duke ecur pas arkivolit të nënës së tij, mes babait Charles dhe xhaxhait Earl Spencer, preku miliona britanikë.
Harry ka deklaruar më vonë se asnjë fëmije nuk duhet t’i kërkohet të ecë pas arkivolit të nënës së tij.
Në vitet që pasuan, ai ndoqi rrugën e përcaktuar nga protokolli mbretëror, studioi në Eton dhe shërbeu në Ushtrinë Britanike deri në vitin 2015, duke marrë pjesë në dy misione në Afganistan. Ai u largua nga ushtria me gradën kapiten.
Por më vonë, Harry foli hapur edhe për vështirësitë e tij psikologjike dhe mënyrën se si kishte përdorur alkoolin dhe drogën për të përballuar dhimbjen.
Në dokumentarin “The Me You Can’t See”, të realizuar me Oprah Winfrey, ai rrëfeu se periudha nga mosha 28 deri në 32 vjeç ishte ndër më të vështirat e jetës së tij. Harry tha se përpara angazhimeve publike përjetonte sulme paniku, djersitje dhe ankth, ndërsa alkoolin dhe drogën i përdorte si mënyrë për t’u larguar nga ndjenjat që përjetonte.
Ai ka thënë gjithashtu se brenda familjes mbretërore nuk flitej për vdekjen e Dianës dhe se pritej që ai të përballonte i vetëm presionin e medias dhe traumën.
Martesa me Meghan Markle dhe largimi nga familja mbretërore
Harry dhe Meghan u njohën në vitin 2016 përmes një miku të përbashkët dhe u martuan në maj të vitit 2018, në Kapelën e Shën Gjergjit në Kështjellën Windsor.
Një vit më vonë lindi djali i tyre, Archie Harrison Mountbatten-Windsor, ndërsa në qershor 2021 erdhi në jetë vajza e tyre, Lilibet Diana Mountbatten-Windsor.
Megjithatë, marrëdhëniet me familjen mbretërore nisën të përkeqësoheshin. Më 8 janar 2020, Harry dhe Meghan njoftuan se do të tërhiqeshin nga detyrat mbretërore dhe do të përpiqeshin të bëheshin financiarisht të pavarur.
Çifti u largua fillimisht drejt Kanadasë dhe më pas u vendos në Shtetet e Bashkuara.
“Spare” dhe rrëfimet që tronditën pallatin
Në janar 2023 u publikua autobiografia e Harry-t, “Spare”, e cila shkaktoi reagime të forta në familjen mbretërore.
Në libër, Duka i Sussex foli edhe për marrëdhënien me vëllain e tij dhe për martesën e babait të tyre me Camilla Parker Bowles. Harry zbuloi se ai dhe William kishin shprehur kundërshtimin e tyre ndaj martesës së Charles me Camilla, por më pas e kishin pranuar vendimin e të atit.
Tashmë, rikthimi i Harry-t dhe Meghan-it në Britani po shihet si një kapitull i ri për familjen mbretërore, në një kohë kur kujtimi i Dianës, trauma e Harry-t dhe përçarja me William-in vazhdojnë të jenë pjesë e historisë së tij publike.