Lëvizja e radhës e Bashkimit Europian është pajisja me lejeqëndrimi 3-vjeçare e të gjithë ukrainasve që largohen nga vendi.
Në një vizitë në pikën kufitare midis Rumanisë dhe Ukrainës, komisionerja e çështjeve të brendshme të BE-së, Ylva Johansson tha se deri më tani kanë hyrë 400 mijë shtetas ukrainas në BE.
“Ne duhet të përgatitemi për miliona refugjatë që pritet të largohen nga Ukraina”, u shpreh ajo.
Ministrat i kërkuan të dielën Johansson-it të përgatisë propozime për të nxitur direktivën e mbrojtjes së përkohshme të BE-së, e hartuar pas luftës së viteve 1990 në Ballkan, por që nuk është përdorur kurrë deri më tani. E krijuar për të trajtuar ardhjet masive të refugjatëve në bllokun 27-vendesh, direktiva parashikon të njëjtin nivel mbrojtjeje në të gjitha shtetet e BE-së, duke përfshirë nleje qëndrimi dhe mirëqenie sociale.
Johansson tha se shpresonte që ministrat e brendshëm të BE-së të bien dakord deri të enjten për skemën e mbrojtjes për personat që largohen nga Ukraina.