Policia greke ka goditur një organizatë kriminale ndërkombëtare që dyshohet se merrej me transportimin e sasive të mëdha të marijuanës nga Shqipëria drejt Turqisë, përmes territorit grek.
Operacioni u zhvillua në orët e para të së premtes, më 14 gusht, në një zonë të Selanikut, me pjesëmarrjen e strukturave të ndryshme të Policisë së Greqisë.
Në kuadër të operacionit u arrestuan dy shtetas të huaj, 43 dhe 58 vjeç, ndërsa një person tjetër, i identifikuar si pjesëtar i organizatës, është shpallur në kërkim.
Hetimet, të kryera edhe në bashkëpunim me autoritetet kundër drogës të Maqedonisë së Veriut dhe Kosovës, zbuluan se organizata kishte një strukturë hierarkike dhe përdorte kamionë të transportit ndërkombëtar për trafikimin e drogës.
Marijuana fshihej në ngarkesa me letër për riciklim, në të cilat ishin krijuar kripte të posaçme për fshehjen e lëndës narkotike. Ngarkesat e ligjshme përdoreshin gjithashtu për të kamufluar lëvizjet e automjeteve.
Sipas hetimeve, personi që ndodhet në kërkim koordinonte aktivitetin në Greqi, siguronte vendet për ruajtjen e përkohshme të drogës, organizonte fshehjen e saj në ngarkesat me letër dhe koordinonte shoferët për transportin drejt Turqisë.
58-vjeçari kishte rol në transportin, fshehjen dhe dërgimin e drogës nga Greqia në Turqi, ndërsa 43-vjeçari dyshohet se merrte lëndën narkotike nga Shqipëria dhe e fshihte në hapësirat e krijuara posaçërisht brenda ngarkesave me letër.
Gjatë operacionit, dy të arrestuarit u gjetën në një ambient të mbyllur në Selanik, ku mbanin tetë paleta me letër për riciklim. Katër prej tyre ndodheshin brenda një automjeti gjysmërimorkio, ndërsa katër të tjera pranë tij.
Kontrollet zbuluan në brendësi të ngarkesave pako me marijuanë, me një peshë totale prej 324 kilogramë e 474 gramë, të destinuara për transportin e mëtejshëm drejt Turqisë.
Në total, policia sekuestroi 324.474 kg marijuanë, një gjysmërimorkio, dy automjete, dy telefona celularë, një targë automjeti të huaj, 11 çanta bosh dhe 1,165 euro.
Sipas autoriteteve greke, përfitimi i paligjshëm që organizata priste nga aktiviteti kriminal vlerësohet në më shumë se 700 mijë euro.
Dy personat e arrestuar janë dërguar në organet kompetente të drejtësisë, ndërsa hetimet vijojnë për identifikimin dhe arrestimin e bashkëpunëtorëve të tjerë në Shqipëri dhe Turqi.