Situata në Shqipëri nga moti i keq, është me një bilanc shumë të rëndë, sidomos në veriun e vendit. Nga moti keq ka 2 viktima. Drejtori i Gatishmërisë dhe Emergjencave, Robert Hysenllari tha se deri më tani 24 familje janë evakuuar për shkak të përmbytjeve si pasojë e reshjeve të shiut që kanë përfshirë vendin që prej ditës së djeshme.
Ai deklaroi se qyteti më i prekur është Shkodra duke thënë se 150 banesa kanë pasur probleme me ujin. Për të deri më tani në të gjithë vendin 3500 hektarë tokë ndodhen nën ujë.
“150 banesa kanë probleme me ujin, ndërkohë 24 familje janë evakuuar. Përgjithësisht banesat kanë qenë në qarkun e Shkodrës. Disa banorë kanë zgjedhur që të qëndrojnë te të afërmit, ndërsa për të tjerët ka konvikte, hotele. Ka variante të ndryshme për sistemimin e banorëve. Në qarkun e Durrësit ka pasur rrëshqitje të dheut, ku ka pasur ndërhyrje. Në qarkun e Tiranës ka pasur probleme, por me ndërhyrje situata është zgjidhur. Sakaq deri më tani 3500 hektarë tokë janë përmbytur”.