Prokuroria e Posaçme kundër Krimit dhe Korrupsionit ka dërguar në gjyq dosjen në ngarkim të pedagogut të Akademisë së Sigurisë, Qetësor Gurra, si dhe policit Dritan Lelaj. Ky i fundit akuzohet se ka ofruar 4 mijë euro për një provim që do të bënte për të marrë gradën “Nënkomisar”, shumë e cila është pranuar nga pedagogu.
Sipas SPAK, “është provuar tej dyshimit te arsyeshëm bazuar në prova se i pandehuri Dritan Lelaj ka ofruar përfitim e parregullt monetar të pandehurit Qetësor Gurra, i cili nga ana tjetër e ka pranuar këtë ofertë për përfitim të parregullt me qëllim ndikimin e paligjshëm tek funksionarë të tjerë publike të Akademisë së Sigurise dhe Drejtorisë së Përgjithshme të Policisë së Shtetit për të favorizuar të pandehurin Dritan Lelaj në rezultatin fitues në provimin e fitimit të gradës “Nënkomisar” për ndjekjen e studimeve në ciklin e parë në Akademinë e Sigurisë, për vitin akademik 2021-2022, të zhvilluar në datën 27.10.2021”.
Në përfundim të hetimeve, SPAK ka dërguar për gjykim edhe shtetasen, Silvana Miho, si e përfshirë në këtë skemë korruptive.
“Rezulton e provuar se i pandehuri Dritan Lelaj gjatë procesit të provimit/ankimit ka përdorur një dokument në të cilin janë paraqitur rrethana të rreme që nuk përputhen me të vërtetën, dokument ky i lëshuar nga e pandehura Silvana Miho, si personi që ka patur për detyrë ta lëshojë dokumentin”, thuhet në njoftimin e prokurorisë speciale.