Kanë kaluar pesë vite nga miratimi i vendimit nr. 106, datë 24.11.2021 i Këshillit Bashkiak Mirditë, me të cilin Pallati i Kulturës në Rrëshen u emërtua zyrtarisht me emrin “Gjokë Beci”. Megjithatë, deri më sot, ky vendim nuk është ekzekutuar nga Bashkia Mirditë.
Institucioni vazhdon të funksionojë pa emrin dhe pa pllakën përkujtimore në hyrje, pavarësisht se formalisht të gjithë shprehen “dakord” për vendosjen e saj.
Kjo situatë ngre disa pyetje thelbësore që meritojnë përgjigje publike: Pse Bashkia Mirditë nuk e ka zbatuar ende një vendim të Këshillit Bashkiak? Cila është arsyeja e kësaj zvarritjeje të pajustifikuar? A ka pengesa administrative, financiare apo politike? Kush mban përgjegjësi për moszbatimin e vendimit? A ekziston një qëndrim i pashprehur që realisht nuk e dëshiron vendosjen e emrit “Gjokë Beci”?
Në një shtet funksional, vendimet e organeve vendimmarrëse nuk janë sugjerime, por detyrime ligjore. Moszbatimi i tyre minon besimin e qytetarëve te institucionet dhe krijon dyshime për standarde të dyfishta apo mungesë vullneti.
Gjokë Beci është një figurë e njohur dhe e respektuar për kontributin e tij, dhe nderimi i tij nuk është thjesht një akt simbolik, por një detyrim moral dhe institucional. Heshtja dhe hezitimi nuk janë përgjigje.