5062 persona janë përgjuar në Shqipëri për llogari të hetimeve të Prokurorisë përgjatë vitit 2019. Këto përgjime janë bërë në kuadër të procedimeve penale përfshirë hetimet e ish- Krimeve të Rënda dhe Prokurorive të rretheve.
Kryesisht veprat penale për të cilat është lejuar përgjime kanë qenë, grupet kriminale, narkotrafiku, prostitucioni, korrupsioni dhe veprat penale të lidhura me terrorizmin.
Rezulton se vendimet e përgjimeve kanë qenë 2714 të tilla ndërsa burime për ReportTv bëjnë me dije se përgjimet nuk kanë përfshirë vetëm bisedat telefonike, por edhe rrjetet sociale dhe platformat e komunikimit. Në këtë raport të Prokurorisë tashmë të dorëzuar në parlament rezulton se ekstradimet kanë patur një numër të lartë 180 persona kryesisht shqiptarë të dërguar jashtë vendit ku kanë kryer krime dhe 157 të ekstraduar nga jashtë drejt Shqipërisë.
Ndalur tek ligji i dekriminalizimit rezulton se prokuroria ka marrë 204 kërkesa për verifikimin e të shkuarës së personave zyrtarë të lartë, politikan dhe të zgjedhur. Prej këtyre kërkesave 163 janë përfunduar, 15 emra kanë rezultuar me probleme për të cilët është kërkuar humbja e postit dhe janë proceduar penalisht për deklarim të rremë dhe 41 kërkesa janë mbartur për vitin 2020 dhe janë ende në shqyrtim.