64 ditët e protestës në çadrën e vendosur mes kryeministrisë dhe kryesisë së Kuvendit, sipas Partisë Demokratike janë dëshmi se nga kjo forcë politike nuk do të ketë dhunë gjatë ditës së hënë, kur është paralajmëruar bllokimi i rrugëve në akset kryesore kombëtare.
Në një deklaratë për mediat shpërndarë nga zyra e shtypit e PD-së, sqarohet se opozita nuk do të përfshihet në dhunë, por vetëm do të ushtrojë të drejtën e saj demokratike për të protestuar kundër qeverisë.
Kjo deklaratë vjen pas qëndrimit zyrtar që mbajti Partia Socialiste ndaj thirrjeve të Bashës, që sipas të majtës ishin rrezik për rikthimin e trazirave në vend, njëjtë si në vitin famëkeq të ’97-ës.
PD-ja e quan këtë qëndrim, justifikim të kryeministrit Edi Rama për të qëndruar në pushtet.
Deklarata e plotë e PD:
Partia Demokratike dhe opozita kanë 64 ditë që protestojnë, pasi mbajtën një nga mitingjet më të mëdha që ka parë ndonjëherë Shqipëria. Të gjitha veprimet e saj kanë qenë paqësore dhe shembull i qytetarisë më të lartë që ka dëshmuar shoqëria shqiptare. Nuk ka patur asnjë provokim, asnjë incident të vetëm, asnjë prishje të qetësisë apo pronës publike. Partia Demokratike nuk ka nevojë për dhunë dhe nuk do të përfshihet kurrë në dhunë. Kauza e lirisë dhe e demokracisë është kauza më e fuqishme në botë dhe ne ndjehemi të fuqishëm në të drejtën tonë.
Edi Rama duhet të mësohet me demokracinë dhe të drejtat e qytetarëve për të protestuar dhe për të shprehur mosbindjen e tyre civile. Referencat e Edi Ramës ndaj 1997-ës janë veprime të dëshpëruara të një njeriu që edhe vetë e di se nuk i ka mbetur më asnjë justifikim për të qëndruar në pushtet, veç ngjalljes së frikës tek njerëzit. Frymëzuesit dhe drejtuesit politikë të 1997-ës Edi Rama i ka në krye të PS-së dhe në Kuvend bashkë me bandat e ‘97-ës qe po i liron një nga një nga burgu për të ruajtur me ta pushtetin e tij të kriminalizuar.
Protesta e opozitës do ta shpëtojë Shqipërinë nga krimi që ka sjellë Edi Rama. Me besimin tek vlerat e demokracisë dhe lirisë, ne do të vazhdojmë qëndresën tonë qytetare me çdo mjet demokratik deri sa të sigurojmë zgjedhjet e lira dhe të ndershme.
/TiranaNews/