“Eurovision Song Contest 2023”, do të mbahet në Mbretërinë e Bashkuar dhe kjo nuk është më një sekret. Ukraina si shtet fitues, nuk është në gjendje për të mbajtur festivalin, edhe pse Presidenti Zelensky e dëshironte këtë gjë.
Por cili do të jetë qyteti pritës i festivalit Europian? Media “BBC”, si edhe Unioni Europian i Transmetuesve, kanë njoftuar se në garë janë 7 qytete: Birmingham, Glasgow, Leeds, Liverpool, Manchester, Newcastle dhe Sheffield.
Interes shfaqën 20 qytete, në të katër kombet e Mbretërisë së Bashkuar: Anglia, Irlanda Veriore, Skocia dhe Uellsi. Të gjithë aplikantët demonstruan se si do të pasqyronin kulturën, muzikën dhe komunitetet ukrainase për të shënuar faktin se Ukraina është fituese e Eurovizionit të këtij viti.
7 qytetet janë përzgjedhur në listën e ngushtë bazuar në aftësinë e tyre për të përmbushur një sërë kërkesash minimale që tregojnë se ata kanë kapacitetin, aftësinë dhe përvojën për të pritur një ngjarje të kësaj shkalle dhe kompleksiteti.