I veshur me uniformën e një admirali të flotës, me medalje dhe me dorën në shpatë. Kështu shfaqet mbreti Charles III në portretin zyrtar që u zbulua sot. Por në Mbretërinë e Bashkuar kanë shpërthyer polemikat, sepse portreti kushtoi 8 milionë paund nga qeveria.
“Tetë milionë paund për këtë? Çfarë humbje e turpshme parash”, akuzojnë aktivistët e “Republic”, të cilët ishin shprehur kundër tij që në nëntor, në momentin e prezantimit. Lideri i sindikatës së mësuesve, Daniel Kebede, komentoi me ironi mbi iniciativën: “Pikon çatia? Lagështia hyn nga korniza e dritares së plasaritur? Ajo që i duhet shkollës suaj është imazhi i mbretit Charles i printuar në letër me cilësi të lartë”.
Vitin e kaluar, Zyra e Kabinetit njoftoi se kishte lënë mënjanë fonde për t’u ofruar të gjitha organeve publike, autoriteteve lokale, gjykatave, shkollave dhe forcave të policisë, një portret falas të mbretit Charles III si pjesë e një programi për monarkun e ri dhe për të vazhduar traditën që ka parë portrete zyrtare të Elizabeth II të ekspozuara në zyrat publike gjatë mbretërimit të saj të gjatë.
