Kreu i shtetit Ilir Meta është takuar me kryetarin e Komisionit të Politikës së Jashtme në Kongresin Amerikan Eliot Engel në Tropojë. Ata kanë marrë pjesë në ceremoninë e vendosjes së emrit “Kongresmeni Eliot Engel” një rruge.
“Nuk ka forcë në botë, që të vendosë në diskutim aleancën shqiptaro-amerikane! U përpoq komunizmi për pesëdhjetë vite të shuante çdo ndjenjë proamerikane, por ja që nuk ia arriti dot për shkak se historia e dy vendeve dhe kombeve tona është shumë e thellë dhe është e parrezikuar, pavarësisht se intrigat asnjëherë nuk do të përfundojnë për t’i përçarë shqiptarët në emër gjoja të Shteteve të Bashkuara të Amerikës!”, tha Meta në fjalën e tij.
Ndërsa vetë Engel vlerësoi mikpritjen shqiptare. “Ua them miqve të mi në Nju-Jork dhe Uashington se mund të udhëtosh anembanë botës si amerikan, por askund nuk do të trajtohesh aq mirë se sa nga miqtë tanë shqiptarë”, tha ai.
Pas kësaj ceremonie, Meta dhe Engel vendosën në shenjë respekti një buqetë me lule te shtatorja e Heroit të Demokracisë, Azem Hajdari në sheshin kryesor të Bajram Currit, në prani të personaliteve të ftuar dhe drejtuesve të pushtetit vendor.
