Seanca ndaj ish ministrit të Brendshëm Saimir Tahiri është shtyrë për herë të tretë dhe për vetë të pandehurin është poshtëruese për drejtësinë të humbasë letrat me të cilat kërkoi arrestimin e tij në Parlament.
“Dhe një çerdhe kalamajash është më e organizuar se kaq. Nuk di si ta mendoj që të humbas më tepër durim, kur ka protokoll, një sistem, ku dihet kush i ka dërguar dhe kush i ka marrë po nuk di si mund të vazhdohet kështu dhe çfarë lloj serioziteti është ky, ku me këto letra prokuroria kërkoi arrestimin tim. Sot i ka humbur. Me të njëjtat letra që kërkoi arrestimin tim në Parlament sot vjen e thotë ka humbur. Nuk dua ta di nëse është e qëllimshme apo gabim njerëzor. Nëse është e qëllimshme është e keqja më e vogël, se i bie të jetë kush ka qëllim për ta zvarritur”, tha Tahiri.
Lexo edhe- Me to u kërkua arrestimi i Tahirit, cilat janë letrat që janë “zhdukur” nga dosja
Tahiri tha se shpreson të jetë mungesë vëmendje, por ai theksoi se është i gatshëm të heqë dorë nga të gjitha provat në favor të tij, mjafton që gjyqi të mos shtyhet.
“Shpresoj të jetë mungesë vëmendje apo nuk e di ca emri ti vë. Unë e thashë dhe në seancë ato për fat të keq janë prova në favorin tim po nuk ka problem, unë heq dorë se gjyqi po shtyhet. Po heq dorë nga dëshmi, që janë në favorin tim. Po nuk ka problem heq dorë dhe nga këto, mjafton të mos shtyhet më një procedim penal që nisi me kërkesë për arrestimin tim dhe sot letrat janë zhdukur dhe një procedim penal që ka nisur ka 2 vjet dhe letrat janë zhdukur. Kjo është qesharake, nuk ndodh as në dyqanin në cepin më të fundit të Shqipërisë e jo më në shtetin shqiptar”, tha ish ministri i Brendshëm.