Kreu i Partisë Demokratike Lulzim Basha ka përshëndetur vendimin e Gjykatës së Durrësit për të mos i dhënë mandatin e kryetarit të bashkisë kandidates fituese të Partisë Socialiste Valbona Sako.
Në një status në Facebook, Basha thotë se ka ende gjyqtarë që kanë të shenjtë Kushtetuën dhe ligjin, që janë me kurajo për ti shërbyer shtetit të së drejtës dhe jo shtetit partiak.
SHKRIMI I BASHES NE FACEBOOK
Farsa e 30 qershorit ishte masakër e Kushtetutës, e ligjit dhe e standarteve. Dua të përshëndes vendimin e Gjykatës së Durrësit, i cili sjell shpresë se në këtë vend ka gjyqtarë e gjyqtare që e kanë të shenjtë Kushtetutën dhe ligjin, se ka shërbyes civilë me kurajo dhe ndërgjegje që i shërbejnë shtetit të së drejtës dhe jo shtetit partiak.
Farsa e 30 qershorit është një grusht kriminal institucional i Edi Ramës, përmes të cilit ai uzurpoi pushtetin vendor, por edhe KQZ-në dhe gjithë sistemin e administrimit të zgjedhjeve përfshi kolegjin zgjedhor. Të gjithë ata që u bënë pjesë e këtij grushti kriminal institucional, të gjithë ata që i shërbyen Edi Ramës për të dhunuar Kushtetutën dhe ligjin me 30 qershor, do të përgjigjen para drejtësisë për veprimet e tyre kriminale.