Pothuajse një muaj pas zgjedhjeve Komisioni Qendror i Zgjedhjeve ka shpallur rezultatin përfundimtar të zgjedhjeve të 30 qershorit.
Ky rezultat u miratua me katër vota pro dhe një kundër, atë të kryetarit Klement Zguri.
Shqipëria zgjodhi mes Kushtetutës dhe pazarit politik, tha Denar Biba, duke u shprehur se kjo ndodhi për herë të parë. Ai shtoi se ka ndjerë mbështetje të jashtëzakonshme të perëndimorëve në këtë proces.
Por nuk mendon kështu kreu i KQZ-së i cili ka shpjeguar dhe votën e tij kundër. Ai i tha kolegut Biba se zgjedhjet janë dhe një ngjarje politike dhe nuk mund të ndahen nga njëra-tjetra. Zguri e ka quajtur formalitet vendimin e sotëm.
Por për kryetarin e KQZ-së mosmarrëveshjet do të vazhdojnë dhe pasi të miratohet ky rezultat.
“Problemi im është se përmes votës sonë duke pasur parasysh kulturën publike që me votën nënkuptojnë dhe cilësinë e zgjedhjeve, unë besoj se kjo merr një rëndësi tjetër. Vota nuk bëhet thjesht formale, por gjithsesi dua të them preokupim im është se përmes votës sonë kemi vënë dhe një notë për sjelljen e KQZ, performacën e KQZ. Unë besoj që KQZ në këtë proces zgjedhor përmes transparencës dhe kamuflimit, standardit ligjor dhe kundërstandardit, ligjshmërisë dhe arbitraritetit, neutralitetit dhe anshmërisë së qartë partiake për fat të keq në logjikën time KQZ ka zgjedhur të dytën.
Vota për këtë proces sigurisht që ngelet votë dhe për punën e KQZ. Me keqardhje e them e kam të pamundur për shkak të një performance të dobët të KQZ, të mundet ti japë një notë kaluese, për mua është e pamundur. Unë do të votoj kundër dhe për arsyen e thjeshtë sepse unë dua që kjo performancë por dhe të gjithë të zgjedhurit të mos kthehet në standard pune në të ardhmen. Nuk e dëshiroj këtë dhe një nga arsyet e votës kundër është pikërisht dhe kjo gjë.
Më duhet të them se është e dukshme, unë nuk bija dakord me shumicën, kolegët e mi, ndërkohë shpresoj shumë që kolegët e mi ti thërrasin vetëdijes ligjore dhe të reflektojnë”, tha Zguri.
