Skandalet në Bashkinë e Matit nuk kanë të sosur. Gjatë fushatës elektorale u regjistruan plot të tilla. Administrata u mblodhi kartat e identitetit zgjedhësve me probleme ekonomike. Të tjerë u kërcënuan me heqjen e saj nëse guxojnë të votojnë me 30 qershor. Tri ditë me radhë, 28, 29 e 30 qershor bashkiakët marshonin si triumfatorë rrugëve të Burrelit, duke krijuar një situatë aspak normale.
Skandalet arritën kulmin ditën e votimit. E gjithë administrata, në qytete e fshatra ishte instaluar pranë qendrave të votimit dhe fotografonte çdo qytetar që i drejtohen qendrës së votimit. Pikërisht këto foto janë përdorur ditët e fundit nga drejtuesit dhe specialistët e bashkisë në të gjitha njësitë administrative për të larguar nga skema përfituesit e ndihmës ekonomike.
Banorë të fshatrave në Rukaj, Derjan e Macukull u shprehën se specialistët e ndihmës ekonomike nuk kanë pranuar t’i përfshijnë në listat e përfituesve. Në ndonjë rast atyre u është thënë se nuk duhet të shkonin në votimet e 30 qershorit, të tjerë janë hequr nga listat pa ju dhënë asnjë argument ligjor.
Do të jetë detyrë e drejtuesve të rinj të bashkisë Mat të verifikojnë shkeljet e kryera dhe të marrin masa që asnjë përfitues të mos ndëshkohet për shkak të bindjeve politike, ndërkohë personat përgjegjës duhet të japin llogari.