Shqipëria ka vuajtur gjithmonë nga plaga e emigracionit, pasi vitet e fundit po vihet re një tendencë në rritje këtij fenomeni. Shtresa e popullsisë që është prekur më tepër janë të rinjtë, të cilët kërkojnë të emigrojnë sa më larg Shqipërisë, por duket se përveç vendit tonë ka një tjetër vend që mban rekord europian në emigrim.
Rumunët zënë vendin e parë në BE për emigracion të popullsisë. Gati një e pesta e rumunëve jetojnë dhe jashtë vendit.
Sipas Zyrës Federale Gjermane të Statistikave shkruan DW, në fillim të vitit 2019, në Gjermani ishin të regjistruar rreth 700 000 rumunë. Në Itali dhe Spanjë, numri i rumunëve që jetojnë dhe punojnë është mbi një milion.
Sipas OECD-së, Rumania është një nga vendet kryesore të origjinës në sektorin e emigracionit familjar dhe lëvizjes së lirë brenda Bashkimit Evropian.
Sipas vlerësimeve të autoriteteve rumune, numri i rumunëve të mërguar është katër milionë, që do të thotë rreth 20 për qind të popullsisë rumune. Në muajt e verës, numri i punëtorëve sezonalë në ndërtim dhe bujqësi shkon deri në pesë milionë.