Bujar Kusi, pronari i vilës ku u qëllua me armë zjarri për vdekje 26-vjeçari Indrit Çelaj dhe djemtë e tij Griseldo dhe Albano Kusi nuk janë emra të panjohur për drejtësinë teksa disa herë janë përfshirë në ngjarje kriminale.
Albano Kusi ka qenë i përfshirë në një vrasje në Krrabë në vitin 2010, ku u vra Shkëlzim Nozlli për një borxh prej 650 euro. Sipas lajmeve të kohës bëhej fjalë për shitjen e një pistolete që Kusi i kishte bërë viktimës, dhe që i kishte ngelur borxh këtë shumë parash.
Vetëm një vit më pas, në gusht të 2011 do të arrestohej vëllai i tij, Griseldo Kusi, i dyshuar për tentativën e vrasjes së Maksut Hysës, ngjarje e ndodhur në fshatin Mnik të Tiranës.
Por probleme me drejtësinë ka patur dhe i ati i tyre, Bujar Kusi. Në një komunikatë të policisë së Tiranës, që mban datën 2 dhjetor 2014, Bujar Kusi është arrestuar pasi ka ndërhyrë në sahatin e tij të dritave. “Më datën 02.12.2014 ora 18.00, është bërë arrestimi në flagrancë i shtetasit Bujar Kusi 47 vjec, banues në Tiranë, pasi në rrugën ”Myslym Shyri”, është kapur në flagrancë, me ndërhyrje të paligjshme në sahatin e tij me numer kontrate 268642. Neni 137/2 i K.Penal”, thuhet në atë komunikatë.