Pak orë para mbledhjes plenare të Komisionit të Posaçëm për Reformën Zgjedhore, bashkëkryetari i tij, Oerd Bylykbashi, i ka kërkuar mazhorancës ndryshimin e rendit të ditës.
Në kërkesën drejtuar bashkëkryetarit dhe anëtarëve të Komisionit, Bylykbashi kërkon heqjen e pikës që lidhet me reflektimin e hartës së re territoriale në Kodin Zgjedhor, duke argumentuar se kjo çështje nuk është dakordësuar mes palëve dhe është përfshirë në mënyrë të njëanshme në rendin e ditës.
Sipas tij, puna e Komisionit duhet të mbështetet në parimin e konsensusit mes mazhorancës dhe opozitës, si dhe në barazinë e përfaqësimit dhe vendimmarrjes së të dyja palëve.
Në vend të diskutimit për hartën territoriale, Bylykbashi propozon që në rendin e ditës të përfshihen rekomandimet e OSBE/ODIHR për garantimin e kushteve të barabarta në garën zgjedhore, ndarjen e shtetit nga partia dhe ndalimin e përdorimit të administratës e burimeve shtetërore për qëllime elektorale.
Ai thekson se kjo çështje është diskutuar më herët në Komision dhe është zhvilluar edhe një tryezë konsultimi me partnerë ndërkombëtarë, ekspertë dhe përfaqësues të shoqërisë civile.
Duke rikujtuar se mandati i Komisionit përfundon më 30 nëntor, Bylykbashi argumenton se çdo devijim nga prioritetet e përcaktuara rrezikon përmbushjen e objektivave përpara zgjedhjeve të 9 majit 2027.
Në përfundim, bashkëkryetari i Komisionit ka kërkuar që deri në orën 11:00 të 9 nëntorit, sekretaria t’u komunikojë anëtarëve rendin e ditës të ndryshuar.