Pas disa kohësh larg vëmendjes politike, kryetarja e LSI Monika Kryemadhi u shfaq mbrëmjen e sotme në kampin e LRI në Jalë. Kryemadhi tha se ditët që kanë kaluar kanë qenë më të vështirat për partitë politike dhe për vendin. Ajo tha se të rinjtë kanë një rol shumë të rëndësishëm në betejën përballë krimit të organizuar.
“Unë gjithmonë kam qenë organizatore kampit. LSI është shtuar këtë vit vetëm me vajza dhe është një gjë emirë se thonë që është bereqet. LSI hyri si një forcë politike që theu monopolin e dy partive të mëdha. Le të jetë kjo javë e kampit të Jalës java e hapjes së aktiviteteve për 15 vjetorin e LSI sepse me 16 shtator LSI bëhet 15 vjeç.
Historiku i LSI është një histori e cila shumë prej nesh kanë kaluar vitet më të bukura të jetës, kemi kaluar momentet tona më të rëndësishme, por kemi kaluar edhe sfidat më të vështira. Sfidat janë ato që të rrisin e të forcojnë për të ecur përpara. Jemi rrëzuar e jemi ngritur. Mos i merrni shumë seriozisht lojërat politike që bëjmë ne këtu. Mos i shihni për të qenë lider menjëherë, lider është ai që fal dashuri për grupin.
Ditë që i kemi kaluar kanë qenë ditë të vështira, për partitë e gjithë politiken shqiptare, për institucionet, por këto ditë të vështira nuk janë asgjë përpara përgjegjësive që kemi ne të LSI. Ju të rinjtë keni një rol shumë të rëndësishëm. Është një betejë përballë një krimi të organizuar, është e vështirë, por përballja juaj në këtë sfidë do të jetë fitimtare sepse ëndrrat tuaja janë më të forta se makutëria e klasës politike”, tha Kryemadhi