Pas deklaratës së ministres së Shtetit për Marrëdhënien me Parlamentin, zëdhënësi i Presidentit Tedi Blushi reagon ashpër, duke theksuar se të “çmendurit për t’i shpëtuar shiut, futen në pellg”.
Sipas reagimit, deklarata janë tymuese e radhës për mbulimin e PPP-ve të paligjshme që u miratuan sot, duke shtuar çmimet për rrugët Milot-Balldre dhe Orikum-Dukat janë shumë më të larta e se kostot.
Sipas deklaratës, vetëm për rrugën “Porti i Jahteve – By-pass Orikum – Dukat, çmimi i dakordësuar midis palëve është rreth 16 mln euro, më e lartë se kostoja e projektit e publikuar nga vet autoriteti kontraktor për konkurrim, ndërsa për rrugën Milot Balldren, çmimi është 52 mln euro më i lartë.
Deklarata e plotë e zëdhënësit të Presidentit, Tedi Blushi:
Të çmendurit, për t’i shpëtuar shiut, futen në pellg. Njësoj si e çmendura E., e cila u zhyt edhe sot në llumin e shpifjes, për t’i shpëtuar shiut të së vërtetës, duke lëshuar tymuesen e radhës, me shpresën se do largohet sadopak vëmendja nga keqperdorimi i Kuvendit për mbulimin e PPP-ve të paligjshme që u miratuan sot:
Ligji nr.51/2019 dhe Kontrata Koncesionare për segmentin rrugor “Porti i Jahteve – By-pass Orikum – Dukat (Ura e Shën Elizës)”, sipas ofertës vlera totale 70 119 755 euro, dhe pas negocimit dhe dakordësimit ndërmjet palëve vlera do të jetë 67 359 926 euro plus TVSH-në.
Çmimi i dakordësuar midis palëve është 16,784,906 Euro, më i lartë se kostoja e projektit e publikuar nga vet autoriteti kontraktor për konkurrim.
Ligji nr. 52/2019 dhe Kontrata Koncesionare për ndërtimin e segmentit rrugor Milot-Balldren, ashtu si dhe kontrata Orikum-Dukat janë propozuar, hartuar nënshkruar dhe miratuar në kundërshtim me parimin e shtetit të së drejtës; në kundërshtim të hapur me interesin publik dhe në shkelje të parimit të konkurencës së lirë dhe të barazisë përpara ligjit.
Për rrugën Milot Balldren Çmimi i dakordësuar midis palëve në vlerën prej 213 665 040 Euro plus TVSH është 52,165,040 Euro, më i lartë se kostoja e projektit e publikuar nga vet autoriteti kontraktor për konkurim.
Për t’i dhënë një mbrojtje këtij procesi të paligjshëm, dhe për të shmangur çdo përgjegjësi nesër qeveria ka miratuar një rregull të ri, për t’ia kaluar përgjegjësinë Kuvendit, me qëllim aministimin e gjithë procesit të zhvilluar në paligjshmëri të plotë.
Keqardhje për të çmendurën E., e cila pasi u përdor për të nxjerrë me këpucë të kuqe doganat, po ofrohet për t’i nxjerrë dritat e kuqe edhe ekonomisë kombëtare.