Ngjarja e rëndë në Iran. 15 viktima është bilanci i një aksidentit ajror ku një avion mallrash ka ngatërruar pistën e uljes dhe është përplasur me murin e një ndërtese. Nga aksidenti ka mundur të shpëtojë vetëm mekaniku i avionit.
Një avion kargo i kompanisë ajrore të Kirgistanit me 16 persona në bord u përplas mëngjesin e të hënës në aeroportin e Fat’h, pranë kryeqytetit Iranian, Teheran.
Lajmi u konfirmua nga mediat vendase të cilat theksojnë se avioni i përplasur, një Boeing 707, ishte nisur nga Bishkek, kryeqytet i Kirgistanit.
Sipas informacioneve të para, avioni është përplasur gjatë uljes dhe piloti ka pasur vështirësi të ulej, ndërkohë që në zonë kishte një stuhi të fortë.
Burime të aeroportit sqaruan se avioni u përplas me murin e një ndërtese pasi piloti ngatërroi pistën.