Ukraina do të nisë transportimin e organeve për transplantim me mjete ajrore pa pilot (dronë), njoftoi sot Ministria e Shëndetësisë e vendit.
Kievi konsiderohet një lider botëror në fushën e dronëve dhe prodhon mijëra të tillë çdo vit, nga dronët me rreze të gjatë veprimi, të pajisur me eksplozivë, deri te dronët e vegjël të zbulimit (FPV), për luftën kundër Rusisë.
“Ukraina po nis një projekt eksperimental për transportimin e organeve për transplantim me mjete ajrore pa pilot“, njoftoi ministria përmes publikimeve në platformat e rrjeteve sociale.
Instituti i Kardiologjisë në varësi të ministrisë disponon tre dronë të specializuar, të cilët mund të përshkojnë distanca deri në 700 kilometra, shpjegoi ministria. Përdorimi i tyre do të përmirësojë kohën e transportimit të organeve, të cilat mund të ruhen vetëm për disa orë.
Në vijën e frontit, Ukraina prej kohësh përdor dronë dhe robotë të telekomanduar për qëllime mjekësore, kryesisht për furnizimin e forcave të saj dhe evakuimin e ushtarëve të plagosur nga zonat e luftës.