Kungulli vjeshtak, që vijon të jetë i pranishëm në treg edhe në muajt e dimrit, është një nga kënaqësitë e tryezave të kësaj stine. Mund të përdoret në shumë mënyra por supa, ngelet receta më e përhapur dhe e shëndetshme!
Përbërësit 4 persona: 2 kunguj te vegjël 2 thelpinj hudhër 3 qepujka 1kg lëng mishi pule 2 lugë gjelle vaj ulliri 3-4 gjethe sherbele 24 lugë gjelle salcë kosi ca fara kungulli për zbukurim
Përgatitja: Çajmë kungujt përgjysmë, i pastrojmë nga farat dhe i pjekim ngadalë në furrë derisa të zbuten. Në një tenxhere shtojmë vajin e ullirit, qepujkat dhe hudhrat e prera hollë dhe i kaurdisim derisa të zbuten.
Pasi kungujt të jenë pjekur, u heqim tulin dhe e shtojmë në tenxhere së bashku me lëngun e mishit të pulës. E lëmë të ziejë për gati 20 minuta. Supën e përgatitur e kalojmë në mikser derisa të bëhet kremoze.
E hedhim përsëri në tenxhere dhe e rregullojmë për kripë.Shtojmë gjethet e sherbelës. E ndajmë nëpër pjata ose sipas dëshirës dhe në kungujt e zbrazur nga tuli.
E zbukurojmë me salcë kosi, fara të pjekura kungulli dhe vaj ulliri te freskët.