Lidhja Demokratike e Kosovës do të formojë koalicion qeverisës me Vetëvendosjen dhe kjo është konfirmuar tashmë nga kandidatja për kryeministre e LDK-së, Vjosa Osmani.
Në një postim në rrjetet sociale ajo thotë se rezultati i zgjedhjeve të 6 tetorit ka treguar që qeverinë e ardhshme duhet ta udhëheqin partitë që kanë qenë deri dje në opozitë, LDK-ja dhe Lëvizja Vetëvendosje.
E vetmja sfidë përpara, thotë Osmani, është arritja e këtij koalicioni, gjithmonë në interes të Republikës së Kosovës.
Deklarata e saj vjen pas deklarimeve të Albin Kurtit që nëse nuk arrihet koalicionin me LDK, atëherë vendi do të shkojë përsëri në zgjedhje.
Kurti kishte thënë se partisë së parë që do t’i trokasë në derë për koalicion është partia që udhëhiqet nga Isa Mustafa.
Edhe Mustafa pas takimit që kishte pasur dje me ambasadorin amerikan, Philip Kosnett, ka thënë se do të takohen me Albin Kurtin, dhe do të vazhdojnë punën për koalicion aty ku e kishin lënë para zgjedhjeve.
POSTIMI I VJOSA OSMANIT
Të dashur qytetarë të vendit tim,
Këtë vjeshtë janë mbushur plot 20 vjet që jam bërë anëtare e LDK-së dhe gati po aq që kam shërbyer në institucionet e Kosovës. Ka qenë rrugë jo e lehtë, plot pengesa e sfida, sikur për shumë të rinj e të reja në vendin tonë. Deri tani, ishte një rrugëtim i jashtëzakonshëm, përgjatë të cilit kam takuar mijëra gra e burra, vajza e djem, qytetarë të mirë të këtij vendi që më kanë mbushur plot shpresë për të ardhmen. I falënderoj miliona herë, nga thellësia e zemrës, të gjithë që na përkrahën e besuan në ne, si dhe të gjithë aktivistët e veprimtarët që kurrë nuk reshtën së punuari me vetëmohim. Arritëm që të gjithë së bashku, por për një kohë tejet të shkurtë prej vetëm një muaji, ta ringrisim LDK-në në një rezultat që nuk e kishte nga viti 2004. Por, na mbetet edhe shumë punë për të bërë, edhe shumë sfida për të kaluar, e ato mund t’i kalojmë vetëm së bashku.
Më në fund, qytetarët, jo vetëm që votuan, por, ajo votë ishte thirrje për ndryshim e ndëshkim ndaj qeverisjes së keqe. Qytetarët, poashtu, përcaktuan qeverinë e re, e cila duhet të përbëhet nga opozita e deridjeshme. Për mua nuk ka asnjë alternativë tjetër. Koalicioni LDK-VV ka shumë sfida para vetes, por duhet ta ketë vetëm një interes: atë të qytetarëve të Kosovës.
Unë do të punoj dhe do t’i shërbej vendit tim, pavarësisht se ku jam.
Ashtu siç e kam thënë gjithnjë: në secilën betejë, do të jemi së bashku, deri në fund!
E juaja,
Vjosa