Shtetet e
Bashkuara janë shprehur të zhgënjyer për vendimin e Këshillit Europian për sa i
përket hapjes së negociatave me Shqipërinë dhe Maqedoninë e Veriut. Me anë të
një reagimi zyrtar Departamenti i Shtetit shprehet se BE nuk i njohu përpjekjet
dhe reformat e të dy vendeve.
Në reagimin në fjalë thuhet se DASH shpreson që Këshilli Europian do të arrijë
konsensus për një vendim pozitiv për të dy vendet kohë përpara Samitit
BE-Ballkani Perëndimor verën tjetër. Mes të tjerash zëdhënësi i Departamentit
të Shtetit Morgan Ortagus thekson se një vendim pozitiv do të rikonfirmonte
besueshmërinë për integrimin e këtyre dy vendeve në BE. Ndër të tjera SHBA
shpreson që të gjendet një konsensus për hapjen e negociatave para Samiti
BE-Ballkan Perëndimor në majin e ardhshëm.
Në fund Departamenti i Shtetit shpjegon se SHBA do të vijojë të mbështesë
Maqedoninë e veriut dhe Shqipërinë dhe se i inkurajon të dy vendet qëndrojnë të
palëkundura në ndërtimin e një shoqërie transparente.
Reagimi i plotë i DASH:
Shtetet e Bashkuara mbështesin angazhimin e Maqedonisë së Veriut dhe Shqipërisë për integrimin transatlantik dhe aspiratat për t’u anëtarësuar në Bashkimin Evropian. Jemi të zhgënjyer që Këshilli Evropian nuk i njohu përpjekjet shumë të forta të reformës së secilit vend duke rënë dakord për të hapur negociatat e pranimit në këtë kohë. Një vendim pozitiv do të rikonfirmonte besueshmërinë e rrugës së tyre në BE dhe do të shtyhej fort kundër aktorëve të jashtëm keqdashës, të cilët kërkojnë të minojnë vlerat perëndimore dhe komunitetin euro-atlantik. Ne e pranojmë që Këshilli Evropian nuk i tha “jo” as Shqipërisë, as Maqedonisë Veriore, dhe as BE-ja nuk vendosi kushte të reja për hapjen e negociatave të pranimit. Shpresojmë që Këshilli Evropian të arrijë një konsensus mbi një vendim pozitiv për të dy vendet përpara Samitit BE-Ballkan Perëndimor në majin e ardhshëm.
Shtetet e Bashkuara do të mbeten një partner strategjik i Maqedonisë së Veriut dhe Shqipërisë pasi ata vazhdojnë punën e tyre për të forcuar sundimin e ligjit, përpjekjet e mëtejshme kundër korrupsionit, zhvillimin e ekonomive të tyre dhe luftimin e krimit të organizuar. Ne i inkurajojmë të dy vendet të qëndrojnë të palëkundura në ndërtimin e një shoqërie transparente, të bazuar në rregulla, demokratike, të përgjegjshme për nevojat e qytetarëve. Shtetet e Bashkuara do të vazhdojnë të punojnë me partnerët evropianë për të përparuar qëllimet e përbashkëta të stabilitetit dhe sigurisë në Ballkanin Perëndimor.