Drejtori i Agjencisë Shtetërore të Kadastrës Artan Lame ka publikuar një foto të pazakontë në rrjetet sociale të 25 viteve më parë.
Lame shfaqet me një mëz në Qytezë të Korçës ku dhe ka përshkruar edhe ndjesinë e hidhur kalimit të viteve dhe të rinisië.
Megjithëse Lame sqaron se i referohet “mëzit Azat”, ky duket qartë si një paralelizëm rreth jetës së Lames, ku ndër të tjera shton se sot e “kanë lidhur me frerë e i kanë hedhur shalë a samar, i kanë vënë përgjegjësira e ngarkesa, e do jetë mbushur me shqetësime e halle.”
Mesazhi i Artan Lames:
MËZI AZAT
Kështu u thonin pleqtë mëzave ende të parritur, si puna e këtij këtu që, një çerek shekulli të shkuar, në behar të ’94-ës, bridhte i lirë e pa gjë në kurriz brinjave të Qytezës.
Tani, një çerek shekulli më pas, e kanë lidhur me frerë e i kanë hedhur shalë a samar, i kanë vënë përgjegjësira e ngarkesa, e do jetë mbushur me shqetësime e halle.
Nga shkujdesja e këtushme s’i ka mbetur më shenjë dhe jelet e shpupurisura i kanë rënë. Siç këndonte e ndjera gjyshja Eniká: “Vate djalëria vate / që kur vura brisk në faqe!”.
Ore, besoj se e kuptoni që e kam fjalën për mëzin…