Rei Manaj ka qenë një nga futbollistët më premtues shqiptar dhe në kohën kur firmosi me Interin, u duk se do të shkëlqente por nuk ndodhi ashtu. Ai u huazua disa herë dhe gjithmonë kishte probleme disiplinore teksa në Spanjë, ka rinisur gjithçka nga fillimi te Albasete, ose të paktën ashtu u duk.
Së fundmi, Manaj ka thyer sërish disiplinën në dhomat e zhveshjes dhe për këtë arsye, klubi i Albasetes e ka dënuar. Ai ka zhvilluar stërvitje individuale pasi në këtë mënyrë, klubi synon që të rikthejë Manajn në gjendjen e mëparshme dhe të reflektojë. Vetë trajneri e ka zbuluar diçka të tillë megjithëse nuk përjashton mundësinë që Manaj të jetë me skuadrën këtë javë.
“Manaj ka thyer disiplinën dhe klubi e ka dënuar, gjë të cilën unë e respektoj. Shpresojmë të reflektojë për këtë dhe ka mundësi që të jetë sërish në fushë në ndeshjen ndaj Kadiz por nesër do të vendosim. Ai është stërvitur individualisht nga dënimi”, u shpreh trajneri.