Instagrami forcon rregullat ndaj përmbajtjes së vetë-dëmtimit. “Do të heqim dhe foto të tjera që mund të mos tregojnë vetëvrasjen apo vetëdëmtimin, por përfshijnë materiale dhe metoda që lidhen me të”, shpjegon në një postim zyrtar Adam Mosseri, shefi i platformës në pronësi të Facebook.
Kjo lëvizje e rrjetit social forcon përpjekjet e ndërmarra tashmë që në shkurt pas presioneve të forta të Britanisë së Madhe, që erdhi pas vdekjes së Molly Russel, nxënësja 14-vjeçare që u vetëvra pasi pa përmbajtje të lidhura me vetëvrasjen në Instragram.
Familja e vajzës protestoi publikisht duke folur dhe në BBC. Mosseri është takuar dhe me sekretarin e shëndetit në Mbretërinë e Bashkuar për të diskutuar mbi politikat e Instagram mbi përmbajtjet vetë-lënduese.
“Ne kemi zgjeruar më tej politikat tona për të ndaluar më shumë lloje vetëdëmtimi dhe përmbajtje vetëvrasëse. Do të duhet kohë për të zbatuar të gjitha këto, por nuk do të jetë hapi i fundit që bëjmë”, thekson ai, duke shtuar se politika e re e platformës është e bazuar “në këshilla të ekspertëve, akademikëve dhe organizatave të shëndetit mendor”.