Niko Kovac nuk është më trajneri i Bajern Mynih. Lajmi është zyrtarizuar pak minuta më parë nga klubi bavarez, një ditë pasi ai pësoi një humbje turpëruese 5-1 përballë Eintraht Frankfurt. Sot ishte paralajmëruar një mbledhje në klub për të folur rreth situatës së krijuar, por pakkush mendonte që sezoni do të merrte një kthesë kaq të papritur për bavarezët duke i zhytur në kaos.
“Paraqitja e skuadrës tonë në javët e fundit dhe rezultatet kanë treguar se kishte nevojë për veprim. Unë, Hënes dhe Salihamixhiç kishim një bisedë serioze me Niko këtë të diel duke arritur konsensusin sipas të cilit ai nuk është më trajneri i Bajernit. Ndjejmë keqardhje për këtë zhvillim, dua ta falënderoj Niko Kovaç në emër të klubit për punën që ka bërë e sidomos duke fituar dy trofetë në edicionin e kaluar”, shpjegoi Karl Hainz Rumenige në komunikatën zyrtare.
Hans Flik, asistenti i tij, do të drejtojë ekipin në ditët në vazhdim, duke përgatitur skuadrën për pjesëmarrjen në Ligën e Kampioneve ndaj Olimpiakos si dhe duelin në kampionat të fundjavës së ardhshme ndaj rivalëve të Borusia Dortmund.
“Mendoj se ishte vendimi i duhur i klubit në këtë moment. Rezultatet si dhe mënyra se si kemi luajtur së fundmi bënë që të marr këtë vendim”, tha Kovaç ndërkohë, duke lënë të kuptohet se kishte qenë ai që kishte ofruar dorëheqjen e tij.