Nga Merita Haklaj
Marsida Xhaferllari dhe Arta Vorpsi, si dy juriste të shkëlqyera (dhe këtë e pohojnë krejt palët) kishin rastin sot të tregonin që nuk kanë aplikuar për ato vakanca në emër të askujt, veç të ambicies së tyre profesionale dhe të shërbimit ndaj shtetasve në mbrojtje të Kushtetutës. Do doja t’i kisha parë publikisht të refuzonin këtë lojë që bëhet nga institucionet që patën në dorë kandidimin e tyre apo dhe të hamendësimeve se kë dashkan diplomatët e huaj, kujt po i bëjnë presion ata dhe se si po detyrokan të veprojnë kështu apo ashtu individë të lirë, profesionistë, me integritet, mbi të gjitha një njeri të ligjit (të tillë i presim në ulëset e Gjykatës më të rëndësishme në vend). Dy emra për një vend? Do isha për të dyja, secila në vendin e vet. Por sot sado patetike mund të tingëllojë, do më pëlqente një refuzim i lojës së interpretimit të Kushtetutës sipas leverdisë politike për atë vend.