Kur bëhet fjalë për ndryshimet e mëdha në trupin tuaj (për femrat), menopauza, puberteti dhe shtatzënia janë më kryesoret. Por ndryshe nga puberteti dhe shtatzënia, për menopauzën nuk ka një guidë të caktuar që mund të ndiqet.
Kështu në lidhje me menopauzën janë krijuar shumë keqkuptime dhe mite. Për shembull mund të keni dëgjuar që gjatë kësaj kohe nuk mund të flini mirë apo do të keni dhimbje të vazhdueshme. Por, e vërteta është se menopauza është një periudhë që ndryshon nga personi në person.
Më poshtë keni disa të vërteta dhe mite rreth menopauzës.
Gjatë menopauzës do të shtoni të paktën 5 kg, pavarësisht çdo gjëje. – Mit
Shtimi në peshë është i zakonshëm gjatë menopauzës, gjithsesi shumica e grave shtojnë vetëm 2 – 3 kg dhe jo më shumë. Kjo mund të shkaktohet nga nivelet më të ulëta të estrogjenit, një metabolizëm më i ngadaltë dhe zvogëlimi i masës muskulare që ndodh natyrshëm me plakjen.
Por shtimi i peshës nuk është i paevitueshëm. Ka gjëra që mund të bëni për ta mbajtur peshën tuaj konstante, duke filluar me ushtrim fizik. Rekomandohet 45 minuta kardio, 5 herë në javë për të djegur kaloritë dhe ndërtuar masë muskulare. Gjithashtu në të 50 – at trupi ka nevojë për 10% më pak kalori se në të 30 – at.
Menopauza rrit gjasat për tu prekur nga sëmundje të caktuara. – E vërtetë
Nivelet e ulëta të estrogjenit dhe progesteronit rrisin riskun për t’u prekur nga probleme serioze të shëndetit si sëmundjet e zemrës, goditja në tru dhe osteoporoza. Por ju mund të ndërmerrni hapa për mbrojtjen e shëndetit tuaj, si përshembull 45 minuta aktivitet fizik në ditë dhe ushqyerja e shëndetshme (shumë fruta dhe perime, yndyrna të shëndetshme, drithëra etj.).
Flisni me mjekun tuaj nëse mund të përfitoni nga suplemente si vitamina B, që ndihmon për të mbajtur qelizat e gjakut dhe ato nervore të shëndetshme por është e vështirë të absorbohet nga ushqimi me kalimin e moshës. Gjithashtu, suplementët e vitaminës D mund të ruajnë shëndetin e kockave dhe reduktojnë rrezikun e osteoporozës.
Pas menopauzës do keni gjithmonë dhimbje gjatë seksit. – Mit
Nivelet më të ulëta të estrogjenit shkaktojnë hollimin e indeve të vaginës dhe vulvës. Kjo mund të sjellë një ndjenjë djegieje apo ngushtësie gjatë seksit. Por kjo nuk është e paevitueshme. Mund të përdorni kremra vaginalë zbutës në mënyrë që të shmangni këto probleme. Nëse këto kremra nuk bëjnë punë atëherë mjekja juaj mund t’ju rekomandojë kremra vaginalë estrogjeni ose diçka tjetër.
Menopauza mund t’ju shkaktojë probleme me gjumin. – E vërtetë
Studimet tregojnë se çereku i grave vuajnë nga pagjumësia gjatë menopauzës. Shumë prej tyre mund të kenë probleme me gjumin për shkak të nxehtësisë që ndiejnë gjatë natës. Për ta shmangur këtë mund të provoni të mbani një freskuese afër krevatit tuaj apo të vishni rroba të lehta, të gjëra.
Nuk duhet të merren zëvendësues hormonesh. – Mit
Ekspertët bien dakort që estrogjeni sintetik mund të luajë një rol të rëndësishëm në ngritjen e niveleve të ulëta të estrogjenit, duke shmangur kështu dhimbjen gjatë seksit, djersitjen dhe nxehstësinë gjatë natës etj. Por, meqë përfitimet jo gjithmonë janë më të mëdha se risku potencial, është e rëndësishme të dini se si mund të ndikojnë te ju para se të filloni t’i merrni. Gjithmonë duhet të konsultoheni me mjekun/Shendeti.com