Gjatë mbledhjes së jashtëzakonshme të qeverisë, ministrja e Arsimit, Besa Shahini u shpreh se ka përfunduar inspektimi në shkollat e dëmtuara.
Po ashtu ministrja tha se kanë opsione se kur duhet të fillojë mësimi dhe për këtë duhet të marrin një vendim. Lidhur me këtë Shahini mbështeti më shumë opsionin e mos-hapjes së shkollave në zonat e prekura nga tërmeti si dhe shkollat struktura e të cilave është e paprekur të vijohet normalisht me procesin mësimor duke filluar nga nesër.
Ministrja bëri me dije gjithashtu se Ministria kishte një plan zhvendosjeje të nxënësve nga shkollat e dëmtuara.
“Në Durrës janë 16 shkolla të dëmtuara, në Tiranë janë 23 shkolla, në Lezhë 10 shkolla, në Elbasan kemi edhe 3 shkolla të tjera që nuk mund të rihapen menjëherë.
Janë inspektuar të gjitë shkollat publike, dhe ato private sot. Kemi bërë një plan zhvendosje që nxënësit të vijojnë mësimin në shkollat që nuk mund të hapen menjëherë. Kemi plan me transportin.
Në 26 nëntor drejtorët e shkollave apo dhe të drejtorive Arsimore kanë identifikuar numrin e shkollave e që kanë paraqitur ndonjë shqetësim. Më 27 nëntor inspektorët kanë bërë inspektime dhe më 28-29 inxhinierë nga Kosova kanë inspektuar shkolla, Në Tiranë, Durrës Lezhë. Më 30 nëntor kemi bërë analizën mbi situatën në fjalë. Nuk mendoj se në Durrës…se në qarkun Durrës është koha që të fillojmë të hënën. Edhe Tirana dhe Lezha kanë nevojë për disa rregullime dhe kohë. Kemi dy opsione për nisjen e procesit të shkollës. Të fillojë mësimi në të gjitha qarqet e paafektuara. Të rifillojë në zonat e paprekura dhe të shtyhet në zonat e shpalljes së gjendjes së jashtëzakonshme.
Një opsion i dytë është që të mos fillojë mësimi në Durrës. Ne duhet si kabinet të marrim një vendim”, tha Shahini.