Kryeministri i vendit, Edi Rama, njihet nga shqiptarët si tifoz i zjarrtë i skuadrës së Juventus, ndërsa këtë e ka dëshmuar duke mbajtur veshur në publik xhupin me logon e klubit të “Zonjës së Vjetër.”.
Shefi i qeverisë ka surprizuar dy fëmijët nga Thumana Aurelin dhe Alesjon, të cilët fatmirësisht shpëtuan mrekullisht nga tërmeti i 26 nëntorit dhe për të larguar tmerrin e përjetuar, Rama u mundësoi atyre një takim me Kristiano Ronaldon dhe me ish-gardianin e Kombëtares së Italisë, Gianluigi Buffon.
Në videon e publikuar në rrjetin social “Facebook”, Rama ka biseduar me portierin legjendar të bardhezinjve, të cilit i ka treguar se skuadra e Juventus në Shqipëri është si fe.
Bidesa e Ramës me Buffon:
Kryeministri Edi Rama: Unë jam një juventin i vjetër, por kjo është për një ditë tjetër.
Buffon: E di, kam pasur një kuzhinier shqiptar në Koverçiani (qendra e grumbullimit të kombëtares Italiane), i cili më thoshte gjithmonë që në Shqipëri ka një “fun club” tifozësh të Juventusit dhe janë të çmendur.
Kryeministri Edi Rama: Juventusi është besim fetar në Shqipëri dhe ti je Papa.