Dy shqiptarë kanë humbur jetën gjatë javës së kaluar në Itali. Të martën e 3 Dhjetorit humbi jetën Agron Ismailaj, 56 vjeç. Shqiptari jetonte prej 22 vitesh në Terlizzi dhe punonte në sektorin e luleve.
Ai u gjet në gjendje të rëndë nga kolegët e tij më 1 Dhjetor në dyqanin e luleve ku punonte. Për dy ditë, shqiptari qëndroi në koma, por nuk mundi t’i shpëtonte dot vdekjes.
Për këtë rast, mediat shkruajnë se Policia e Tenenza-s dhe prokuroria e Tranit po hetojnë për të zbuluar shkaqet e plota të vdekjes. Ismailaj la pas gruan dhe dy fëmijë. Në zonë njihej si qytetar model. Prandaj kryetari i Bashkisë, Ninni Gemmato ka caktuar që me 10 Dhjetor, ditën kur do të bëhet funerali i Ismailajt, të jetë ditë zie.
Vetëm disa ditë më vonë, të shtunën, një tjetër shqiptar humbi jetën, kësaj radhe në Novara. 38-vjeçari Gjon Lekaj po çmontonte skelat nga një ndërtesë, kur ra nga një lartësi prej gjashtë metrash.
Teknikët janë duke punuar për të rindërtuar dinamikën e ngjarjes dhe dyshojnë se rënia mund të jetë shkaktuar nga ndonjë sëmundje ose Lekaj ka vënë gabimisht këmbën. I riu ishte me origjinë nga Shkodra dhe jetonte në Porta Mortara sëbashku me gruan dhe dy fëmijët. Këta të fundit duan që lamtumira e fundit të ndjerit t’i bëhet në qytetin e lindjes.