Ditën e djeshme në fshatin Suç të Myftinisë Mat u zhvillua ceremonia e inaugurimit të xhamisë së re të këtij fshati.
Të pranishëm në këtë ceremoni ishin Drejtori i Arsimit dhe Kulturës pranë Komunitetit Mysliman të Shqipërisë, Dorian Demetja, Myftiu i Matit, Fabjon Kolaveri, Myftiu i Dibrës, Muis Kurtulla, Drejtori i Shoqatës “Komiteti i Bashkuar Kuvajtian për Bamirësi”, Ibrahim Mekki, dijetari dhe humanisti i njohur nga Kuvajti, Nebil el Auadi, si dhe donatorët, kontribuuesit dhe besimtarë të shumtë të fshatit Suç të rrethit Mat.
Në fjalën e tij përshëndetëse, Drejtori i Arsimit dhe Kulturës pranë KMSH-së, Demetja, shprehu falënderime ndaj të gjithë atyre që kontribuuan dhe bënë të mundur ndërtimin e kësaj xhamie kaq të domosdoshme për besimtarët e zonës. Sipas tij, kjo xhami do të jetë një mburojë për të gjithë besimtarët e kësaj zone në praktikimin dhe paisjen me dije dhe moral Islam.
Ndërsa Myftiu i Matit, Kolaveri, në fjalën e tij u shpreh se rëndësia dhe roli i veçantë që do të luajë ndërtimi i kësaj xhamie qëndrojnë në kultivimin e vlerave më të larta njerëzore dhe krijimin e një atmosfere më të mirë shpirtërore për zonën.
Kjo xhami u ndërtua falë kontributit të shoqatës “Komiteti i Bashkuar Kuvajtian për Bamirësi”.
Përshëndetje të rastit mbajtën edhe të ftuarit e tjerë të nderit të cilët përcollën mesazhe të shumta.
Pas prerjes së shiritit të përurimit, të pranishmit e shumtë falën bashkarisht edhe namazin e parë në xhaminë e re të fshatit Suç.
