Tre shqiptarë janë arrestuar pasi ekzekutuan me armë zjarri policin malazez Millutin Lekoviq, gjatë kalimit të kufirit.
Ngjarja ka ndodhur në Igalo në afërsi të qytetit Herceg Novi, në orën 14:00, rreth 5 km larg kufirit kroat. Tre personat, të cilët nuk kanë pasur me vete dokumenta identifikimi, në momentin e ndalimit kanë thënë se janë nga Kosova. Nga raporti i policisë malazeze mësohet se Luan Hasanaj 43 vjeç është autor i vrasjes së policit 41-vjeçar Millutin Lekoviq, ndërsa në momentin e ndalimit të tyre kanë qenë edhe dy shtetas të tjerë nga Shqipëria, Lulëzim Hasanaj 49 vjeç dhe një grua Nure Hasanaj 67 vjeçe. Të tre shqiptarët janë ulur në pjesën e pasme të mjetit të policisë dhe gjatë shoqërimit të tyre në Komisariatin e Policisë së Herceg Novit, Luan Hasanaj ka nxjerrë nga një qese, të cilën e mbante në dorë armën e zjarrit dhe ka qëlluar në kokë 41- vjeçarin Millutin Lekoviq.
Nga të dhënat mësohet se Luan Hasanaj është i kërkuar nga autoritetet shqiptare për veprën “Tentativë vrasje e kryer në bashkëpunim”, kurse Nure Hasanaj akuzohej për kërcënim.
Pasi ka qëlluar efektivin, Luan Hasanaj së bashku me Lulëzim Hasanaj dhe Nure Hasanaj janë larguar dhe më pas janë arrestuar pas një shkëmbimi zjarri me policinë malazeze, teksat këta tre tentuan të kalonin në Kroaci në vendin e quajtuar Fusha e Sutorinit.
Gjithashtu mësohet se gjatë shkëmbimit të zjarrit është plagosur në dorë edhe Luan Hasanaj.
Tre shqiptarët janë arrestuar ditën e djeshme rreth orës 17:00, ndërsa po përpiqeshin të kalonin në Kroaci në këmbë.