Plagosja me thikë e një 16-vjeçari nga ana e shokut të tij bashkëmoshatar, para portës së gjimnazit “Andon Zako Çajupi”, në Tiranë, tronditi opinionin publik më 20 shtator 2016.
Dy të rinjtë, nxënës të kësaj shkolle, u përfshinë në një konflikt me fjalë, që u pasua me një sulm me armë të ftohtë drejt minorenit K.S, shkruan “Panorama”.
Pak ditë më parë, Gjykata e Tiranës përfundoi gjykimin e autorit të kësaj ngjarjeje, Marsel S. Ai u deklarua fajtor për akuzën e “plagosjes së rëndë me dashje” dhe u dënua me 3 vjet heqje lirie.
Nga gjykimi i shkurtuar, ai përfitoi uljen e një të tretës dhe i duhet të vuajë përfundimisht 2 vjet heqje lirie. Sipas vendimit të shpallur nga një trup gjykues i kryesuar nga gjyqtari Erjon Bani, i pandehuri Marsel S. ka vepruar me dashje të drejtpërdrejtë.
Ai, shprehej Gjykata, ka parashikuar karakterin shoqërisht të rrezikshëm të veprimeve të tij dhe ka vepruar në mënyrë të kundërligjshme e të vullnetshme, duke qëlluar me thikë shtetasin K.S., duke i shkaktuar dëmtime që kanë qenë të rrezikshme për jetën në çastin e shkaktimit të tyre.
I pandehuri ka treguar se e kishte sharë me shaka të dëmtuarin, që, sipas tij, e ka qëlluar me grusht. Në këtë moment, ai pranon se e kishte qëlluar me thikë në gjaknxehtësi e sipër për shkak të reagimit të tij.
“Unë kam shkuar në shkollë si zakonisht. Në orën 08:00 kam filluar mësim, ku kam bërë tre orë të para, ndërsa orën e katërt nuk kam bërë mësim. Jam futur në orën e pestë, ku kam pasur Histori. Pasi mbarova këtë orën, kam dalë jashtë. Rreth orës 12:30 kam qëndruar jashtë rrethimit të shkollës, në trotuar, ku ishin dhe tre persona, ku njëri ishte shoku im i klasës. Më pas u takova bashkë me dy persona të tjerë”, ka deklaruar Marsel S., duke shtuar se në këtë moment aty ishte afruar dhe i dëmtuari K.S.
“Unë e kam përshëndetur me shaka, me fjalët ‘he mo vari k…’. Ai më ka kthyer përgjigje ku mua m’u duk po me shaka ‘he mo bythë q…’. Unë kam vazhduar me fjalët, duke bërë shaka, por K.S. më ka qëlluar me grusht. Unë në këtë moment kam pasur një thikë me vete dhe e kam nxjerrë në gjaknxehtësi e sipër dhe e kam qëlluar një herë në pjesën e kofshës. Kur e pashë që atij i doli gjak, jam frikësuar dhe ia kam futur vrapit drejt banesës”, ka dëshmuar i pandehuri. Gjatë gjykimit, i pandehuri ka kërkuar falje dhe ka shprehur pendesë për veprën e kryer. /TiranaNews/