Ilir Meta, kreu në detyrë i LSI, i zgjedhur gjatë ditës së djeshme president i ri i Republikës së Shqipërisë, do të jetë në krye të Kuvendit deri një ditë para betimit të tij si kryetar shteti. Më 23 korrik ai do të heq dorë nga funksioni i kryeparlamentarit, për të bërë betimin si president më 24 korrik, ditë kur mbaron mandati 5-vjeçar i Presidentit në ikje Bujar Nishani.
Kështu, Meta do të kryesojë edhe seancën e së enjtes së ardhshme, që shënon edhe mbledhjen e fundit të parlamentit, për shkak të zgjedhjeve të përgjithshme parlamentare që do të mbajë vendi.
“Do të vijoj të jem kryetar i kuvendit të Shqipërisë deri ditën e betimit si president. Do të jap dorëheqjen përpara betimit për arsye të vetë lidhjes midis këtyre institucioneve edhe në planin kushtetues dhe institucional. Por edhe se të enjten e ardhshme do të jetë seanca e fundit plenare”, tha Meta.
Por ndryshe do të jetë për funksionin e tij si kryetar i Lëvizjes Socialiste për Integrim. Në një konferencë për mediat, Meta tha se në mbrëmje kur pritet të zyrtarizohen listat e kandidatëve për deputetë të LSI-së, ai do të heqë dorë nga ky post drejtues dhe cdo funksion brenda LSI-së. Meta sqaroi se drejtimin e LSI-së do ta marrë zv.kryetari aktual, Petrit Vasili.
“Deri më 23 korrik do vijoj të jem kryetar i LSI. Jam i vendosur që sot në mbrëmje pas përfundimit të listave të kandidatëve për deputetë, heq dorë nga ky post dhe të gjitha rolet drejtuese në LSI.
Në listën e partive që do të dorëzohen dhe publikohen nga KQZ në krah të LSI-së, nuk do të jetë emri i Ilir Metës, por i Petrit Vasilit si zv.kryetar i LSI që sipas statutit merr drejtimin e kësaj force politike për të cilat do të shprehet me votim më tej konventa e LSI brenda javës së ardhshme”, – u shpreh Meta.
/TiranaNews/