Kreu i shtetit Ilir Meta duke komentuar nismën e mini shengenit mes vendeve ballkanike thotë se çdo platformë bashkëpunimi duhet të jetë gjithëpërfshirëse dhe jo përjashtuese dhe që si qëllim ka integrimin e rajonit në BE.
Në një intervsitë për “Epoka e Re”, Meta thotë se askush nuk ka pse keqpërdoret për të defaktorizuar Kosovën.
“Çdo platformë rajonale bashkëpunimi, që është gjithëpërfshirëse dhe jo përjashtuese, që udhëhiqet nga partneriteti dhe jo paternalizmi, që sjell kohezion dhe jo konfuzion, e aq më tepër përçarje, dhe që ka vetëm për qëllim integrimin e Ballkanit Perëndimor në Bashkimin Europian është e mirëpritur.
Ky duhet të jetë një parakusht për të promovuar dhe konsideruar iniciativa rajonale premtuese dhe të dobishme.
Çdo iniciativë që provokon debate të panevojshme nuk e ndihmon bashkëpunimin tonë.
Askush nuk ka pse keqpërdoret për të defaktorizuar Kosovën.
Prishtina ka udhëheqësit e saj të zgjedhur me votën e qytetarëve të saj.
Shqipëria, për fat të keq, nuk ka se çfarë t’i mësojë Kosovës, as sa i përket shtetit ligjor, as sa i përket zgjedhjeve e pluralizmit politik, apo qoftë sa i përket demokracisë.
Shteti i Kosovës është jo vetëm tërësisht funksional, por edhe një shembull i demokracisë në rritje, në një rajon që ende vuan nga autoritarizmi dhe pamundësimi i zgjedhjeve tërësisht të lira”, tha Meta.
