Një lajm i mirë vjen për emigrantët shqiptarë që jetojnë dhe punojnë në Greqi. Më në fund pas dy vjetësh Komisioni për Prodhim dhe Tregti në Parlamentin helen ka miratuar sot projektligjin për njohjen e ndërsjellë të lejeve të drejtimit midis Shqipërisë dhe Greqisë.

Tanimë pritet që projektligji të marrë dritën e gjelbër në seancën parlamentare.

Parlamenti grek në njoftim zyrtar bën me dije se “deputetët e Komisionit votuan me shumicë votash ratifikimin e marrëveshjes mes dy vendeve që u paraqit në Komision nga Zëvendës Ministri i Infrastrukturës dhe Transportit, Joanis Qefalojanis”, raporton “VOA”.

Kujtojmë që marrëveshja është nënshkruar mes ministrit shqiptar dhe atij grek në maj të 2018-s, por duhej të miratohej nga Parlamenti që të hynte në fuqi.