Ish-deputetja e PD-së Jorida Tabaku ka reaguar sot në lidhje me borxhin publik, ku sipas saj, duke iu referuar raportit të fundit të Standard and Poor’s, viti 2019 u mbyll me bilanc negativ.
Në një deklaratë për mediat, Tabaku tha se konsumi është në nivelet më të ulëta në vite dhe të ardhurat e munguara rreth 116 milionë euro.
Sipas saj, taksat janë rritura me rreth 2 miliardë euro dhe borxhi publik i rritur në nivelet e 83% duke përfshirë dhe koncesionet dhe PPP.
“Raporti S&P i cili tregon shëndetin e financave të vendit si dhe mundësinë për të paguar borxhin që ka Shqipëria, tregon situatën dramatike në të cilën ndodhet ekonomia”, shprehet ajo.
Po ashtu Tabaku shton se “raporti është një dëshmi që tregon e bardhë mbi të zezë se ekonomia informale është e vetmja ekonomi në Shqipëri. Raporti i Standard and Poor’s rivërteton edhe një herë që Shqipëria ka një rrezik që vjen nga PPP-të të cilat po bëhen gjithnjë e më të pakontrollueshme.”.
Ka vetëm një rrugë, tha ajo, zgjedhje të parakohshme, politika fiskale serioze në periudhën afatmesme dhe afatgjatë, kontroll i borxhit dhe luftë të pa kompromis ndaj PPP-ve dhe borxhit të fshehur që ato prodhojnë”.