Policia e Lezhës bën të ditu se ka ndaluar në mbikalimin e Laçit një autobus që po transportonte 13 shtetas sirianë dhe marokenë të cilët do të largoheshin përmes Kosovës.
Në pranga është vënë drejtues i autobusit dhe fatorino, dhe ndaj tyre tashmë ka nisur hetimi për ndihmë për kalim të paligjshëm të kufirit.
NJOFTIMI I PLOTE
Lezhë
Parandalohet dhe goditet një tentativë për dhënie ndihme për kalim të paligjshëm të kufirit.
Procedohen penalisht 2 shtetas, të cilët po transportonin me autobus 13 shtetas sirian që kishin hyrë në Republikën e Shqipërisë në mënyrë të paligjshme.
Specialistët e Seksionit për Hetimin e Trafiqeve të Paligjshme në Drejtorinë Vendore të Policisë Lezhë referuan materialet hetimore në Prokurorinë e Rrethit Gjyqësor Lezhë për shtetasit B. E., 58 vjeç, banues në Tiranë, drejtuesi i autobusit ku udhëtonin shtetasit e huaj dhe B. B., 34 vjeç, banues në Kukës, faturino i autobusit.
Këta shtetas, në aksin rrugor Mamurras-Lezhë, në vendin e quajtur “Mbikalimi i Laçit” janë kapur nga shërbimet e Policisë Rrugore, me automjetin autobus të linjës Tiranë-Kukës, duke transportuar 13 shtetas të huaj sirian dhe maroken që kishin hyrë në Republikën e Shqipërisë në mënyrë të paligjshme.
Materialet procedurale i kaluan Prokurorisë pranë Gjykatës së Shkallës së Parë Lezhë, për veprime të mëtejshme hetimore, për veprën penale “Ndihma për kalim të paligjshëm të kufirit”.