Në fund, por jo për nga rëndësia, Ditmir Bushati i kushtoi disa fjalë emocionuese edhe familjes së tij ku për shkak detyrës si Ministër për Evropën dhe Punët e Jashtme është detyruar jo pak herë të qëndrojë larg saj. Duke iu referuar thënies së presidentit gjerman Steinmeier që puna e ministrit të Jashtëm është si një mur, nuk ke kohë për askënd, i mungon të gjithëve, edhe stafit, edhe familjes edhe të gjithëve, Bushati iu drejtua familjes së tij me këto fjalë: “Për një falenderim të fundit do të më ndihmonte një rrëfim personal i ish-kolegut tim të çmuar dhe Presidentit aktual të Gjermanisë, Frank-Walter Steinmeier, sipas të cilit Ministri i Jashtëm është i munguari i madh: i mungon ekipit të Ministrisë në përditshmërinë e tij; i mungon përditshmërisë politike; dhe i mungon familjes së tij.
Është pikërisht familja, e cila ka vuajtur më shumë e ka falur më lehtë çdo mungesë timen, duke mbështetur rrugëtimin tim. Dëshiroj t’i falenderoj për përkushtimin e tyre gjatë mungesave të mija e t’u kërkoj një falje për fundjavat e humbura në Blackberry dhe Iphone”.