Prefekti i Qarkut të Dibrës, Nexhbedin Shehu, vijon prej ditësh të ndjekë nga afër situatën në rrethet e këtij rajoni, Mat, Bulqizë e Dibër. Ai ka zhvilluar takime të herëpashershme me katër kryetarët e bashkive, drejtorët e rrugëve, të ujesjellësave, arsimit, shendetësisë, etj.
“Rrugët, tha Shehu, janë mirëmbajtur nga firmat kontraktuese. Rruga Milot-Peshkopi paraqitet në gjendje normale. Edhe rrugët e fshatrave janë hapur nga pushteti lokal. Vetëm fshati Ketë, në Bashkinë e Klosit, është ende i bllokuar, por drejtuesit vendor kanë premtuar marrjen e masave”.
Probleme në këtë qark ka pasur edhe në lidhje me furnizimin me ujë të pijshëm. Shkak janë bërë ngricat dhe defeket në tubacionet kryesore dhe linjat që furnizojnë konsumatorët. Prefekti theksoi se kjo situatë është e njohur në qytetin e Peshkopisë, pasi aktualisht qytetarët marrin ujë vetëm 5-6 orë në ditë.