Ditën e djeshme një nga deputetet e Kuvendit të Kosovës ka ndërmarrë një iniciativë për të parandaluar transmetimin e këngëve që promovojnë lëndët narkotike. Politikani Haxhi Avdyli pak ditë më parë bëri një deklaratë publike ku thoshte: “Si ta lëshojë televizorin ka me pa këngë marihuana, kokaina, kolumbiana ajo s’di kush është ajo Tayna, krejt janë këngë me promovim të drogës, duhet me i ndalu ligji”.
Ky lajm është pasyqruar edhe në shtypin vendas e pasi e pa këtë në ekran, e para që ka reaguar publikisht ka qenë pikërisht reperja Tayna. Kjo e fundit njihet për këngë që kanë në përmbajtje të tekstit emra drogërash dhe ka zgjedhur që në një foto të postuar në Instagram të shpreh hapur mendimin e saj, edhe si kundërpërgjigje ndaj deklaratës së deputetit.
“Në një shtet që vetë nuk mundet të ndalojë përdorimin e lëndëve narkotike ose shumë gjëra të tjera, nuk ma merr mendja që ne si artistë kemi shumë peshë të madhe në veprimet e njerëzve. Ne vetëm këndojmë dhe mundohemi të argëtojmë popullin. Unë vetë nuk përdor asgjë nga këto, madje as duhanin që shumica juaj e pi, nuk e konsumoj, që gjithashtu është i dëmshëm. Kush do ta përdori ne nuk e ndalojmë dot. Kush nuk do, nuk ja japim me zor.
Tek e fundit, nuk kemi rolin e prindërve për të edukuar askënd. Ky është vetëm një zhaner i muzikës që ka tema të tilla e dëgjohet prej atyre që e pëlqejnë. Ju jeni rritur me muzikën Rock që po ashtu ka patur të tilla tema. Nuk duhet të merret personale asgjë që thuhet në tekstet e këngëve. Asnjëherë të rinjve nuk ua rekomandoj të përdorin lëndë të tilla. E fëmijët tuaj, e keni ju në dorë çfarë i lejoni e çfarë s’i lejoni të dëgjojnë, të shohin apo si i edukoni. Besoj që kemi probleme më të mëdha në këtë shtet…” shkruan Tayna në Instagram.