Shtëpia ku lindi Faik Bej Konica, në fshatin Konicë të Greqisë, do të restaurohet. Lajmi është bërë i ditur nga ministri i Kulturës, Rinisë dhe Inovacionit, Blendi Gonxhe, pas takimit me homologen greke, Lina Mendoni, në Prespë.
Përmes një postimi në rrjetet sociale, Gonxhe njoftoi se punimet për restaurimin e banesës do të nisin së shpejti, ndërsa Ministria e Kulturës së Greqisë ka konfirmuar se godina ka marrë statusin e objektit me vlerë historike dhe kulturore dhe se fondet për restaurimin janë siguruar.
Njoftimi vjen pasi Euronews Albania pasqyroi gjendjen e banesës, e cila prej vitesh është lënë në harresë, me mure të dëmtuara dhe e mbuluar nga shkurret.
Në një prononcim për Euronews Albania, Beqir Potka, një nga 17 filantropët shqiptarë që kontribuuan në rikthimin e eshtrave të Faik Konicës në Shqipëri, kërkoi që banesa të restaurohej dhe të kthehej në muze. Ai shprehu gjithashtu gatishmërinë për të kontribuar financiarisht, së bashku me miqtë e tij dhe komunitetin shqiptar në Shtetet e Bashkuara.
Gjatë takimit në Greqi, Gonxhe dhe Mendoni diskutuan edhe për rikthimin në Shqipëri të dy objekteve arkeologjike nga Butrinti, të sekuestruara në Greqi që prej vitit 2002, si dhe për bashkëpunimin në restaurimin e Kishës së Shën Nikollës në Mesopotam dhe pasurive të tjera kulturore.
Bashkëpunimi mes dy vendeve parashikon gjithashtu projekte arkeologjike në Finiq, restaurimin e ikonave dhe trajnimin e restauratorëve shqiptarë në Selanik.