Dy nxënës të shkollës së mesme në Fier janë proceduar penalisht pasi dyshohen se kanë përdorur sprajt me lëndë gazi në ambientet e brendshme të shkollës.
Sipas policisë së Fierit bëhet fjalë për dy 15-vjeçarë, nxënës në klasën e 10-të të kësaj shkolle. Ndaj tyre rëndojnë akuzat e ndotjes së ajrit dhe prishjes së qetësisë publike.
Një ditë më parë rreth 58 nxënës dhe dy mesues u paraqitën në spital me shenja helmimi ndërkohë që ngjarja përhapi panik.
NJOFTIMI I POLICISE
Procedohen penalisht 2 nxënës të shkollës së mesme në Fier, të cilët dyshohen se kanë përdorur sprajt me lëndë gazi, në ambientet e brendshme të shkollës.
Specialistët për Hetimin e Krimeve në Komisariatin e Policisë Fier, nën drejtimin e Prokurorisë Fier, zbardhën ngjarjen e ndodhur ditën e djeshme, ku si pasojë e përdorimit të një sprajti me lëndë gazi, në ambientet e brendshme të shkollës, disa nxënës shfaqën shqetësime me frymëmarrjen dhe pasi morën ndihmën e parë në Spitalin Rajonal Fier, u larguan për në banesë.
Në përfundim të veprimeve hetimore rezultoi se sprajti ishte përdorur nga 2 nxënës të kësaj shkolle, konkretisht A. M., 15 vjeç dhe A. H., 15 vjeç, të cilët u proceduan penalisht.
Materialet i kaluan Prokurorisë pranë Gjykatës së Shkallës së Parë Fier, për veprat penale “Ndotja e ajrit” dhe “Prishja e qetësisë publike”.