Ditën e sotme, e ftuar në emisionin “Rreze Dielli” në “Report TV” ishte prezantuesja e njohur Ketrin Gjoça.
Gjatë intervistës në studio, Ketrin s’la pa përmendur edhe faktin se figurat e vjetra të ekranit janë eleminuar, për t’u zëvendësuar me ato të rejat.
Në këto figura bën pjesë edhe prezantuesja, e cila ka treguar e revoltuar mënyrën e si e eklipsuan nga ekrani.
Ketrin shprehet se nuk i mungojnë idetë, megjithatë askush nuk i ka dhënë mundësinë që ajo të bëjë diçka në ekran.
“Në televizionet italiane, ata persona që kanë një eksperiencë, i mbajnë, i ruajnë. Figurat janë figura. Nuk e di pse drejtuesit tanë të televizionit vijnë në televizion, në atë institucion publik dhe mendojnë se duke hequr figurat e ekranit që kanë gjetur atje, figura të konsoliduara, do krijojnë një televizion të ri. Në emër të të bërit televizion të ri, heqin figura të rëndësishme. Nuk është ky televizioni!
Kam disa programe në mendje, ndaj më vjen keq që nuk jam në ekran. Mungojnë programe për fëmijë. Nuk po them si në atë kohë, ama të lutem shumë, nëse dikush thotë po Keti ‘ti nuk erdhe të sjellësh një ide’, nuk vuajmë për ide. Dikush duhet të më thërrasë të më ngarkojë diçka.
Sapo erdhën drejtuesit e ri, më hoqën programin me të cilën isha në transmetim. Unë isha me një program në transmetim, aneksim në mënyrë jo elegante. Është hera e parë që e them këtë gjë, por do ta thoja edhe sikur mos të pretendoja të dilja në ekran.”- është shprehur prezantuesja.
Ketrin është e njohur për të gjithë si “Teta Keti” e famshme e emisioneve për fëmijë, ndaj do të ishte ide e mirë ta shihnim sërish me formate të tilla në ekran.