Kreu i PAA-së dhe aleati i PD-së, Agron Duka e cilëson të pavend momentin që kryedemokrati Lulzim Basha zgjodhi për të bërë propozimet për sistemin zgjedhor.
Duka tha se Basha nuk zgjodhi kohën e duhur duke pasur parasysh që brenda datës 15 mars pritet të mbyllet reforma zgjedhore.
“Basha e ka thënë edhe herë të tjera që është për një sistem mazhoritar, por momenti për të cilin ai e shtoi këtë artikulimi më duket i pavend sepse ne presim pas një jave të përfundojë reforma zgjedhore. Nuk besoj që ka kohë të bëhet një gjë e tillë. Nuk besoj që kjo mund të zgjidhet brenda këtij kufiri kohor dhe brenda këtij Parlamenti,”, tha Duka
Sipas tij, këto propozime nuk rrezikojnë marrëveshjen dhe klimën e dakordësisë mes palëve. I pyetur nëse do ta mbështeste Bashën për ta dërguar propozimin në një tryezë zyrtare, Duka shfaqet skeptik, pasi sipas tij, nuk mund të realizohet brenda këtij mandati.
“Jo nuk rrezikon asgjë. Ka qenë një dëshirë e Bashës, por jo e grupit opozitar. Unë nuk jam pyetur ndonjëherë. Unë kam kërkuar që të ketë sistem me element maxhoritar. Kur i lexova ne media propozimet, mu dukën interesante, por nuk mund të arrihet brenda këtij mandati,” tha Duka në “Vizion Plus.