Një shqiptar i Diasporës do të bëjë një dhuratë për shtetin shqiptar. Gjatë emisionit “Opinion”, moderatori Blendi Fevziu ka njoftuar ministren e Shëndetësisë, Ogerta Manastirliun se një shqiptar nga Holanda dëshiron që të ndihmojë sistemin shëndetësor të Shqipërisë.
“Më shkruan një shqiptar nga Holanda, dëshiron të dhuronë një kamera termike. Do ta bëjë dhuratë për spitalin. Merret me pajiset shëndetësore kryesisht në Kosovë por do të jetë anonim. Ka gjithë ditën që kërkon të lidhet me ju por nuk mundet,”-tha Fevziu.
Bilanci i COVID-19 në Shqipëri ka shkuar në 51 të prekur. Shkon në 7 numri i mjekëve dhe infermierëve të infektuar, nga Spitali i Durrësit dhe spitali “Shefqet Ndroqi”. Disa ditë më parë një prej të prekurve, ndërroi jetë në Spitalin e Durrësit ndërsa deri më tani vatra e të infektuarve është zgjeruar në Tiranë, Rrogozhinë, Elbasan, Durrës, Lushnje dhe Fier. Ndërkohë jeta në vend është paralizuar thuajse totalisht, nuk ka transport publik, po ashtu dhe shumë vende punë janë mbyllur.
Shumë qytete janë në ‘shtet-rrethim’ dhe është ndaluar dhe lëvizja e makinave private. Dje është miratuar dhe Akti Normativ, që detyron spitalet private që të jenë në shërbim të shtetit gjatë periudhës së emergjencës dhe kush nuk bindet do ketë gjobë deri në 5 milionë Lekë. Po ashtu gjoba do ketë dhe për ata që thyejnë rregullat e vendosura nga qeveria. E vetmja këshillë e përbashkët e institucioneve dhe mjekëve është që qytetarët të qendrojnë në shtëpi dhe të kenë sa më pak kontakte me të tjerët.